ჯილდოს მიზანი

„მასწავლებლის გავლენის“ ჯილდო არის პროფესიული აღიარება და მხარდაჭერა იმ მასწავლებლებისთვის, რომლებიც თავიანთი საქმიანობით ქმნიან მკაფიო, გაზომვად და მდგრად ცვლილებებს განათლების ეკოსისტემაში, როგორც ფორმალურ, ისე არაფორმალურ საგანმანათლებლო სივრცეში.

ჯილდო მიზნად ისახავს წარმოაჩინოს მასწავლებელი როგორც ცვლილებების შემოქმედი, საზოგადოებრივი ლიდერი და ციფრული ეპოქის მეგზური, რომლის საქმიანობა სცდება საკლასო ოთახის საზღვრებს და ქმნის გრძელვადიან პოზიტიურ ზეგავლენას მოსწავლეებზე, კოლეგებზე, სკოლასა და საზოგადოებაზე.

ჯილდოს გრძელვადიანი მისიაა საქართველოში ჩამოყალიბდეს მასწავლებელთა გავლენის ქსელი, რომელიც გააერთიანებს იმ პედაგოგებს, ვინც ქმნის საგანმანათლებლო ინოვაციებს, ავითარებს პროფესიულ კულტურას და მონაწილეობს საზოგადოებრივ ცვლილებებში. აღნიშნული მისია მიიღწევა კონკრეტული ამოცანების გადაჭრის გზით:

· მასწავლებლის პროფესიული როლის გაძლიერება და მისი ავტორიტეტის ამაღლება;

· ინოვაციური, შემოქმედებითი და სოციალური პედაგოგიური პრაქტიკის წახალისება;

· საუკეთესო პრაქტიკის აღმოჩენა, დოკუმენტირება და ფართო საზოგადოებისთვის გაზიარება;

· ფორმალურ და არაფორმალურ განათლებას შორის კავშირების ჩამოყალიბება;

· განათლების სფეროში სისტემური და მდგრადი ცვლილებების მხარდაჭერა.

ჯილდოს კონტექსტში „გავლენა“ ნიშნავს მასწავლებლის საქმიანობით გამოწვეულ ისეთ ცვლილებებს, რომლებიც:

· აუმჯობესებს მოსწავლეთა აკადემიურ შედეგებსა და პიროვნულ განვითარებას;

· ზრდის სწავლაში ჩართულობასა და მოტივაციას;

· აძლიერებს კოლეგების პროფესიულ კომპეტენციას;

· აუმჯობესებს სკოლის კულტურასა და სწავლების ხარისხს;

· უწყობს ხელს თემის სოციალურ, კულტურულ და საგანმანათლებლო განვითარებას.

ჯილდოს ღირებულებითი პრინციპები

„მასწავლებლის გავლენის“ ჯილდო ეფუძნება შემდეგ ღირებულებებს:

1. ადამიანზე ორიენტირებულობა – მოსწავლის, მასწავლებლისა და თემის საჭიროებების გათვალისწინება;

2. ინოვაცია და კრეატიულობა – ახალი მეთოდების, ციფრული ინსტრუმენტებისა და შემოქმედებითი მიდგომების დანერგვა;

3. თანამშრომლობა – პროფესიული პარტნიორობისა და კოლეგიალური მხარდაჭერის განვითარება;

4. სოციალური პასუხისმგებლობა – განათლების როლის გაძლიერება საზოგადოებრივ კეთილდღეობაში;

5. მდგრადობა – შედეგების გრძელვადიანი ეფექტი.

ჯილდოს მისაღები პირობა

• კანდიდატი უნდა იყოს მოქმედი მასწავლებელი ;
• კანდიდატმა უნდა წარმოადგინოს:

· ინოვაციური და შედეგზე ორიენტირებული პედაგოგიური პრაქტიკა;

· საზოგადოებრივი და სოციალური ინიციატივები;

· მონაწილეობა ფორმალურ და არაფორმალურ განათლებაში;

· დადებითი გავლენა მოსწავლეებზე, კოლეგებზე, თემსა და საზოგადოებაზე.

ჯილდოს ნომინაციაზე წარდგენა

მასწავლებელს შეუძლია თავად წარადგინოს თავი, ასევე წარდგენა შეუძლიათ სკოლის დირექტორებს, კოლეგებს ან საზოგადოებრივ ორგანიზაციებს.

ჯილდოს კრიტერიუმების და რეგისტრაციის პირობების შესახებ დეტალური ინფორმაცია განთავსდება ჯილდოს ოფიციალური გამოცხადებისთანავე